गुल्शन, सिद्धान्त र जितेन्द्रले काठमाडौं ११ बाट खेल्ने

काठमाडौं । नेपाली राष्ट्रिय क्रिकेट टिमका फास्ट बलर गुल्शन झासहित जितेन्द्र मुखिया र सिद्धान्त लोहनीले आगामी असोजमा हुने चौथो संस्करणको एभरेष्ट प्रिमियर लिग (इपीएल) टी-२० क्रिकेट काठमाडौं किङ्स-११ बाट खेल्ने भएका छन् ।

काठमाडौं किङ्स-११ ले सामाजिक सन्जाल मार्फत गुल्शन, जितेन्द्र र सिद्धान्तलाई  अनुबन्ध गरेको जनाएको हो ।  गुल्शन पहिलो पटक राष्ट्रिय टिममा पर्दै हाल लिग टु सिरिजका लागि ओमानमा छन् । गुल्शनले यसअघि नेपाल पुलिसबाट घरेलु क्रिकेट खेलेका थिए । 

यस्तै ब्याट्सम्यान सिद्धान्त भने हाल राष्ट्रिय टोली बाहिर छन् । आर्मीका फास्ट बलर  जितेन्द्रलेसमेत यो पटक काठमाडौंबाट खेल्नेछन् । जितेन्द्रलेसमेत राष्ट्रिय टोलीको प्रतिनिधित्व गरिसकेका छन् ।

राष्ट्रिय टिमकै लेगस्पीनर सन्दीप लामिछाने कप्तान रहेको काठमाडौं किङ्स-११ ले पाकिस्तानका पूर्व कप्तान शाहिद अफ्रिदीलाई अनुबन्ध गरिसकेको छ । 

प्रतियोगिता असोज ९ बाट २३ गतेसम्म काठमाडौंमा आयोजना हुनेछ । जसमा ६ फ्रेन्चाइज टोलीको सहभागीता रहेको छ । बिराटनगर वारियर्स, काठमाडौं किङ्स इलाभेन, चितवन ट्राइगर्स, भैरहवा  ग्लाडिएटर्स, ललितपुर प्याट्रीओटस, पोखरा राइनोज याे प्रतियोगिता खेल्नेछन् ।