लगातार अवरुद्ध हुँदै अएको प्रदेश १ प्रदेशसभा बैठक मंगलबारदेखि सुचारु

विराटनगर,२२ असार।नेकपा माओवादी केन्द्रको अवरोधका कारण लगातार अवरुद्ध हुँदै अएको प्रदेश १ प्रदेशसभा बैठक मंगलबारदेखि सुचारु भएको छ । 

मंगलबारको बैठकमा माओवादी केन्द्रको मागलाई सम्बोधन गर्दै सभामुख प्रदीपकुमार भण्डारीले मन्त्रीले सांसदमाथि लान्छित गरेर बोलेको रेकर्ड हटाइने जानकारी दिएपछि बैठक सुचारु भएको हो । प्रदेशसभाको १२ औं बैठकमा भौतिक पूर्वाधार विकास मन्त्री अम्बिरबाबु गुरुङ सदनमा अमर्यादित ढंगले प्रस्तुत भएको र  प्रदेशसभा सांसद मोहनकुमार खड्काका विरुद्धमा व्यक्तिगत लाञ्छना लगाउँदै मन्तव्य दिनुभएको थियो । यसपछि माओवादी केन्द्रले मन्त्रीले आफ्नो बोली फिर्ता लिँदै माफी माग्नु पर्ने र संसदको रेकर्डबाट भाषण हटाउनु पर्ने माग गर्दै आएको थियो । बैठकमा सभामुख भण्डारीले प्रदेशसभामा मर्यादित भाषा प्रयोग गराउन सचेत पनि गराउनुभयो ।

संसद् बैठक बस्नुअघि प्रदेशसभा कार्यव्यवस्था परामर्श समितिको बैठक बसेको थियो । त्यसलगत्तै दलका नेताहरुबीच भएको छलफलले सदन सुचारु गराउने सहमति भएको हो ।